الرسالة التاسعة - لا تنبهر بفكرة المثالية

مع الانستغرام و السناب شات كل الناس بقت حاجاتهم حلوة ... كلهم بيسافروا و بيشاركونا رحلاتهم ، بيروحوا مطاعم فخمة و بنشوف أكلهم ... بيعملوا حفلات فخمة و احنا برضو بعيوننا حاضرين و وصلنا اننا بقينا معاهم في أعراسهم و احتمال احنا ما بنعرفهم ولا هم بيعرفونا ... كل حاجة بقت تصوير اتش دي ... و كل الناس بقوا زي الممثلين وكل الناس شكلهم مبسوطين.

واحنا بنبقى مش مبسوطين ... طبعا ما كلنا .. لما نكون مبسوطين زيهم بنحب ليهم الخير و بيشجعونا برضو نشارك ناس تانيين فرحنا ... لكن لما نكون محبطين و مفلسين و عيننا طالعة ما حنفرح معاك و لاحنتمنى ليك الخير ... و يمكن نغير منك و نحسدك ... دي طبيعه البشر احنا ما ملائكة ... ما في حد يضحك عليك و يقول لك انا بحب ليك الخير دائما في كل حالاتي و مهما انا اتغيرت علي الظروف للاحسن او للأسوأ ... نادر جدا ما تلقى ملاك في هيئة انسان لكن العامة و الاغلب حتى لو كانوا من الاقربين ... لازم ما مشاعر كده ما حلوة تتحرك جواهم تجاهك.

بعدها حيبدأو يطلقوا عليك مسميات ... انسان بتاع مظاهر ، ما عايش واقعه ، مبذر و صفات كثيرة ما لازم تعرف بيها فخليك مستعد للصدمات و الاحباط و ما تقول انا نيت كان اوريهم بلد تانية و لا أشاركهم معلومة ممكن تفيدهم ... ليه بتعمل في نفسك كده؟ انت برضو كنت عايز تعيش شعور التفوق و الانجاز و انك بقيت انسان هاي كلاس و حركات ...  بس نسيت ان المتابعين الكرام ما كلهم زي ... انتبه!

 في عالمنا الحالي الواقعي و الافتراضي كل حاجة شكلها مثالي ، حتشوف كثير من العوائل الجميلة المثالية و السعيدة ، بيوت مفروشه فرش راقي و مكلف أصحابه ، اخر موديلات السيارات ، احدث موبايل ... كل حاجة جديدة و بتلمع و بتجذب ... الناس بتحب الحاجات دي ... الناس بتحلم بالحاجات دي. لكن للاسف نفس الناس اللي بتصرف على كل الماديات دي لما تجي تطلب منهم عشان ناس فعلا محتاجين الفكرة حتختلف ... وحتتصدم بحجم المنح و المساعدات البسيط و اللي يكاد يكون معدوم من طرفهم.
فصورة المثالية الحلوة الجميلة حتختلف في نظرك بعد كده ... صحيح؟

العالم ملئ بالمزيفين فلا تنبهر بالقشرة ... و لا تستعجل في الحكم على الناس ... اقص وقت كافي مع الاشخاص الجدد في حياتك ... كل العلاقات جميلة في اولها و كل الناس جذابين و خلوقين في البدايات. عندك هواية حلوة زي التصوير ... زي زيارة المطاعم و القعدة ف المحلات الجديدة .. أي هواية من الهوايات اللي بتكلفك و بتبقى فيها في نظر الناس " بتبعزق الكاش اللي معاك" مارسها على الضيق كده ... يبنك وبين نفسك أو بين ناس زيك بحبو الهواية دي ... أو اعمل من شغل و تبقى ضربت عصفورين بحجر ...عملت البتحبو و سكت الناس عنك شوية.

استمتع بأشياءك المفضلة مهما كانت تافهة للغير فأنت غير مجبر بشرح ما تحب ... وعن تجربة النصيحة دي.